ටවර් හෝල් රඟහල පදනමේ ඉගෙනුම ලබන සිසු දරු දැරියන් සඳහා විදේශ රටවල් හී වේදීකා නාට්‍ය හා ඒ ආශ්‍රීත අනෙකුත් කාර්යයන් හා පාඨමාලාවන් සිදු කෙරෙන අයුරු අධ්‍යයන කිරීම සඳහා විදේශ සංචාරයක් ලබා දීමට කටයුතු සුදානම් කරන බව බුද්ධ ශාසන, ආගමික හා සංස්කෘතික කටයුතු අමාත්‍ය විදුර වික්‍රමනායක මහතා අද (27) පැවැසීය.

 

ලෝක නාට්‍ය දින සැමරුම් උලෙළට සමගාමීව ටවර් හෝල් රඟහල පදනම මඟින් සංවිධානය කරන ලද මරදාන එල්.ෆින්ස්ටන් රඟහලේදී පැවැති නාට්‍ය දින සැමරුම් උත්වයකට සහභාගී වෙමින් අමාත්‍ය විදුර වික්‍රමනායක මහතා මේ බව සඳහන් කළේ ය.

 

එහිදී වැඩිදුරටත් අදහස් දැක් වූ අමාත්‍ය විදුර වික්‍රමනායක මහතා මෙසේ පැවැසී ය.

 

ටවර් හෝල් රඟහල පදනම මීට වඩා මිනිසුන් හා සමීප විය යුතුයි.එය සිදුවිය යුත්තේ දරුවන් හා සම්බන්ධ වුණොත් පමණයි.අපේ රටේ මීළඟ නාට්‍යවේදීන් වන්නේ මේ දරු පරම්පරාවයි.නාට්‍ය පාසල් කොළඹට හා යාපනයට පමණක් සීමා නොවිය යුතුයි.නුවර එළිය,මඩකළපුව හා දකුණු පළාත වෙතත් නාට්‍ය පාසල් ආරම්භ කිරීම සඳහාත් මේ වන විට අප අවධානය යොමු කර තිබෙනවා.

 

ටවර් රඟහල පදනම හා සම්බන්ධ වී  දිවයින පුරා තෝරා ගත් පාසල්වල  නාට්‍ය සංගම් හදන්න ඒ තුළින් දරුවන්ගේ හැකියා දක්ෂතා ඔප් නංවා අනාගත නාට්‍යෙව්දීන් බිහිකිරීමට අවශ්‍ය වැඩ පිළිවෙලක් ද ආරම්භ කිරීමට කටයුතු සිදු කරන බව ද අමාත්‍යවරයා එහිදී වැඩිදුරටත් සඳහන් කළේ ය.