ගුරු ගැටලුවට විසඳුම අද කැබිනට් මණ්ඩලයට

ගුරුවරුන්ගේ වැටුප් විෂමතා ගැටලුව විසඳීමට අදාළ කැබිනට් පත්‍රිකාව අද (26) පස්වරුවේ රැස්වන කැබිනට් මණ්ඩලයට ඉදිරිපත් කරන බව අධ්‍යාපන අමාත්‍ය මහාචාර්ය ජී.එල් පීරිස් මහතා පැවසීය.
ඒ තුළින් ගුරුවරුන්ගේ ප්‍රශ්නයට පිළිතුරක් ලබාදීමට හැකිවනු ඇතැයි බලාපොරොත්තු වන බව කී ඇමතිවරයා කැබිනට් පත්‍රිකාවේ අන්තර්ගත කරුණු කැබිනට් සාකච්ඡාවෙන් පසු අනාවරණය කරන බව ද සඳහන් කළේය.
මේ සම්බන්ධයෙන් ගුරු වෘත්තීය සමිති සමඟ හෙට (27) උදෑසන සාකච්ඡාවක් පවත්වන බව ද ඇමතිවරයා කීවේය.
ප්‍රශ්නය විසඳීමට උපරිම කැපවීමක් ඇති නිසා සිසු දරුවන් පීඩනයකට ලක් නොකර මාර්ගගත අධ්‍යාපනය අඛණ්ඩව ඉදිරියට ගෙනයන්නැයි ගුරුවරුන්ගෙන් ඉල්ලීමක් කරන බව ද ඇමතිවරයා පැවසීය.
ගුරුවරුන්ට කොවිඩ් මර්දන එන්නත් දෙවන මාත්‍රාව ද අගෝස්තු අවසානයට පෙර ලබා දී සැප්තැම්බර් මුල් සතියේ යම් සැලැස්මක් අනුව සෞඛ්‍ය උපදෙස්වලට යටත්ව පාසල් විවෘත කිරීමට බලාපොරොත්තු වන බව කී ඇමතිවරයා එයට ද පූර්ණ සහයෝගය දෙන ලෙස ගුරුවරුන්ගෙන් ඉල්ලා සිටින බව සඳහන් කළේය.
මේ වන විට රටේ අධ්‍යයන අනධ්‍යයන කාර්ය මණ්ඩලවලින් සියයට 77 කට එන්නත් පළමු මාත්‍රාව දී අවසන් බව ද මහාචාර්ය ජී.එල් පීරිස් මහතා කීවේය.
අමාත්‍යවරයා මේ බව පැවසුවේ ශ්‍රී ලංකා පොදුජන පෙරමුණු මූලස්ථානයේදී අද (26) පැවති මාධ්‍ය හමුවේදීය.