දුවන්න එපා... හැකිතරම් ඇවිදින්න...

කායික ව්‍යායාම වෙනුවෙන් ජිම් මධ්‍යස්‌ථාන සොයන ඔබට කාලයත් වියදමත් ඉතිරි කරගෙන ශාරීරික ව්‍යායාම ලබා ගැනීමේ පහසු මඟක්‌ තිබෙනවා. ඇවිද්ද පය දහස්‌ වටී කිව්වා සේම ඇවිදීම මගින් ඔබට නිරෝගී ජීවිතයක්‌ වෙනුවෙන් අවශ්‍ය ව්‍යායාම ඉතා පහසුවෙන් උපයා ගන්න පුළුවනි.
ඇවිදීම ආරම්භයේදීම විශ්වකර්ම ප්‍රතිඵල ලබා ගන්න බැහැ. ව්‍යායාම කිරීමේදීත් ඒ වෙනුවෙන් වූ ආරක්‌ෂිsත පිළිවෙතක්‌ තිබෙනවා. මෙහිදී ඇවිදීම වැනි ව්‍යායාම මගින් ඔබට කිසිදු අතුරු ආන්තරාවක්‌ ඇති වෙන්නේ නැහැ. ඇමරිකා එක්‌සත් ජනපදයේ ආරක්‌ෂිත වෛද්‍ය ප්‍රතිකාර පිළිබඳ විශේෂඥ වෛද්‍ය ජොආන් මැක්‌සන් සඳහන් කරන අන්දමට දිනකට මිනිත්තු තිහක්‌වක්‌ ප්‍රාණවත් ලෙසින් කඩිසර ලෙසින් ඇවිදිනවා නම් හෘදයාබාධ රෝග තත්ත්වයෙන් 30% ක පමණ නිදහසක්‌ ලැබෙනවා. දිනකට එක්‌ වතාවකදී මිනිත්තු දහය බැගින් තුන්වතාවක්‌ හෝ හතර වතාවක්‌ ඇවිදීමෙන් ඔබ නොසිතන තරම් සෞඛ්‍යමය වාසි ලබා ගැනීමේ හැකියාව ලැබෙන බවයි, ඔහු පවසන්නේ.
ඇවිදීමේදී ඒ වෙනුවෙන් පැතැලි අඩිය සහිත සැහැල්ලු පාවහන් යුගලක්‌ පාවිච්චි කිරීම වැදගත් වෙනවා. එවිට මාංශපේශි වේදනාවෙන් නිදහස්‌ වෙනවා. ඇවිදීම සෙමෙන් පටන් ගත යුතු අතර ඇවිදීම සිරුර උණුසුqම් වගේම සිරුර සිහිල් කිරීමේ ව්‍යායාම වෙනුවෙන් යොදා ගන්නත් හැකියාව තිබෙනවා. ඇවිදින විට ඔබ අද දවසට ගමන් කළ දුර සහ ඒ වෙනුවෙන් ගත වුණ කාලය සටහන් කර තබන්න. මහන්සි ගතියක්‌ දැනුණේ නම් එයද සටහන් කරන්න. සතියක්‌ දෙකක්‌ ගෙවෙන විට ඔබ ලබා ඇති ප්‍රගතිය හෝ ගැටලු පිළිබඳව අදහසක්‌ ගොඩනඟා ගැනීමට හැකියාව ලැබෙනවා.
මොළයට රුධිරය සපයන නාළ අවහිර වීම නිසා ඇතිවෙන ආඝාත තත්ත්වයෙන් නිදහස්‌ වීමටත් ඇවිදීම ඉතා හොඳ ව්‍යායාමයක්‌ බව අමුතුවෙන් කිව යුතු නැහැ. හාවර්ඩ් විශ්වවිද්‍යාලයේ මහජන සෞඛ්‍ය අංශයේ සිදු කරන ලද අධ්‍යයනයකින් පෙන්වා දෙන්නේ සතියකට පැය හයක්‌ හෝ ඊට වැඩි ප්‍රමාණයක්‌ ඇවිදීමේ යෙදුණ උදවියගේ ආඝාතය වැළඳීමේ අවදානම 40% කින් පහළ ගිය බවයි.
ස්‌ථුලතාව හෙවත් තරබාරුවට තිබෙන එකම ඖෂධය ආහාර පාලනය කර ගැනීම යන සිද්ධාන්තයට වඩා ඇවිදීමෙන් විශිsෂ්ට ප්‍රතිඵල ලැබෙන බව දැන් හඳුනාගෙන තිබෙනවා. දිනකට අවම වශයෙන් පැය භාගයක්‌වත් ඇවිදින්නේ නම් ඔබේ සිරුරෙන් කිලෝ ජූල් 1000 ක ශක්‌ති ප්‍රමාණයක්‌ දහනය කර ගැනීමේ හැකියාව තිබෙනවා. දියවැඩියා රෝගයෙන් ආරක්‌ෂාව ලැබීමේ වාසනාවත් අයිති වෙනවා.
ඇවිදීම නිසා කාන්තාවන් පිළිකා රෝග තත්ත්වයෙන් ආරක්‌ෂාව ලබන බව ඇමරිකාවේ සිදු කරන ලද අධ්‍යයනයකින් පෙන්වා දී තිබෙනවා. කාන්තාවන්ගේ මාසික ඔසප් චක්‍රය අවසාන වීමත් සමගම විවිධාකාර කායික හා මානසික අපහසුතාවන් ඇති වෙනවා. ඒ වගේම මේ කාලය තුළ පිළිකා රෝගයට ගොදුරු වීමේ සම්භාවිතාවත් ඉහළයි. නමුත් ඇවිදීම මගින් මේ තත්ත්වය මඟහරවා ගන්න හැකියාවක්‌ තිබෙනවා.
ඇට්‌ලන්ටාහි ජෝර්ජියා විශ්වවිද්‍යාලයේ වෛද්‍ය අල්පා පටෙල් මගින් සිදු කරන ලද මෙම අධ්‍යයනයට ආර්තවහරණයට පත් කාන්තාවන් 73,000 ක්‌ සම්බන්ධ කර ගත්තා. මෙම පිරිස වයස අවුරුදු 50 සිට 75 අතර වයස පරාසයේ සිටි පිරිසක්‌ වුණා. වසර දහහතක්‌ මුළුල්ලේ මෙම අධ්‍යයනය සිදු කරනු ලැබුවා. මෙම අධ්‍යයනයේ මුල් අදියර 1992 සිට 1993 කාලයේදී පටන් ගෙන තෝරා ගත් පිරිසට ප්‍රශ්නාවලියක්‌ ලබා දුන්නා. එහිදී ඔවුන්ගේ සාමාන්‍ය ගති පුරුදු පිළිබඳව විමසීමක්‌ කළා. ඔවුන්ගේ පුරුදු අතර පිහිනීම රූපවාහිනි නැරඹීම වැනි තොරතුරු ඇතුළත් වුණා. ඒ සමගම මේ පිරිසට සතියකට පැය හතක්‌ ඇවිදීමේ යෙදෙන ලෙස උපදෙස්‌ ලබා දුන්නා.
මේ ඇවිදීමේ පුරුද්ද සමග නැවතත් 1997 සිට 2009 අතර කාලයේදී ප්‍රශ්නාවලියක්‌ ලබා දුන්නා. සතියකට පැය තුනක්‌ ඇවිදීමේ යෙදුණ කාන්තාවන්ට වඩා පැය හතක්‌ ඇවිදීමේ යෙදුණ කාන්තාවන්ට පිළිsකා රෝගයට ගොදුරුවීමේ අවදානම 14% කින් අඩු වී තිබුණා. දිගු කාලයක්‌ ව්‍යායාම්වල නිරත වෙනවාට වඩා ඇවිදීම මගින් සාර්ථක ප්‍රතිඵල ලැබෙන බව අධ්‍යයනයේ ප්‍රධානි අල්පා පටෙල් පෙන්වා දෙනවා.
ඇවිදීම නිසා ඔස්‌ටියෝපොරෝසිස්‌ රෝග තත්ත්වයෙන් නිදහස්‌ වීමේ හැකියාව ඔබට ලැබෙනවා. අද මිලියන ගණනක්‌ මේ රෝග තත්ත්වයෙන් පීඩා විඳිනවා. දණහිසට සම්බන්ධ අස්‌ථි ගෙවීයැම වගේම ඉරියැම නිසා ඇති වෙන වේදනාකාරී තත්ත්වයට ඇවිදීමෙන් පහසුවක්‌ ලැබෙන බව දැන් හඳුනාගෙන තිබෙනවා.
මානසික අවපීඩනයට පත්ව සිටින පුද්ගලයන්ට ඇවිදීම මගින් ගොඩනැඟෙන සැහැල්ලු මානසිකත්වය නිසා ජීවිතයට අලුත් ගොඩනැඟීමක්‌ ලබා දෙන්නට තරම් ඇවිදීමේ ශක්‌තිය ප්‍රබලයි.
පුන්‍යා චාන්දනී ද සිල්වා